PEDAGOGIKA FAKULTETIDA XALQARO PSIXOLOGLAR KUNI KENG NISHONLANDI

22-noyabr kuni Kattaqo‘rg‘on davlat pedagogika instituti Pedagogika fakultetida “Xalqaro psixologlar kuni” munosabati bilan tadbir o‘tkazildi. Mazkur sana doirasida talabalar ishtirokida davra suhbati tashkil etilib, unda fakultet rahbariyati ham faol qatnashdi.
Tadbirni Pedagogika fakulteti dekani, psixologiya fanlari doktori (DSc), professor Azamat Saidov ochib berdi va barchani “Xalqaro psixologlar kuni” bilan samimiy muborakbod etdi.
Professor o‘z tabrik so‘zida ushbu sana nafaqat kasb bayrami, balki inson ruhiyatini anglash, unga yo‘l ko‘rsatish hamda qo‘llab-quvvatlash kabi yuksak mas’uliyatli vazifaga sadoqat timsoli ekanini ta’kidladi.
Shuningdek, psixolog kasbi inson qalbining nozik jihatlarini his eta bilish, ruhiy jarohatlarga malham bo‘lish, umidsizlikka cho‘kkanlarga ishonch va dalda berish kabi ulkan vazifalarni bajaruvchi sharafli va mas’uliyatli soha ekani alohida qayd etildi. Mazkur kasb chuqur bilim, keng dunyoqarash, sezgirlik, mehr-muruvvat va insonparvarlikni talab qilishi bilan ahamiyatlidir.
Tadbir davomida talabalar psixologiyaning dolzarb yo‘nalishlari, zamonaviy yondashuvlar va mutaxassisning jamiyatdagi o‘rni haqida fikr almashdilar.