Adib Masihulloh Madaminov bilan ijodiy uchrashuv

Masihulloh Madaminov shoir, muharrir, O‘zbekiston Yozuvchilar uyushmasi a’zosi.
U 1998-yil 21-dekabrda Farg‘ona viloyati Oxunboboyev tumanidagi G‘ishmon qishlog‘ida tug‘ilgan. Mirzo Ulug‘bek nomidagi O‘zbekiston Milliy universitetining Ijtimoiy fanlar fakulteti falsafa yo‘nalishini tamomlagan.
Adabiy ijod bilan 7-sinfdan shug‘ullanib keladi. Ilk she’rlari maktab davridayoq viloyat va respublika nashrlarida chop etilgan. Ijodining asosiy qismini nazm tashkil etadi.
Mehnat faoliyatini 2018-yilda “Kitob dunyosi” tahririyatida muxbir sifatida boshlagan. Keyingi yillarda “O‘zbekiston” nashriyot-matbaa ijodiy uyi, “O‘zbekiston” nashriyoti hamda Nizomiy nomidagi Toshkent davlat pedagogika universitetining “Pedagog” gazetasida turli lavozimlarda faoliyat yuritgan.
2023-yildan O‘zbekiston Yozuvchilar uyushmasida faoliyat olib bormoqda. Hozirda Uyushmaning Hududiy bo‘limlar bilan ishlash va nazorat-tahlil kotibiyati bosh mutaxassisi.
Shoirning “Ertakli kunlar” nomli she’riy to‘plami O‘zbekiston Yozuvchilar uyushmasining “Birinchi kitobim” loyihasi doirasida 10 ming nusxada nashr etilgan.
Masihulloh Madaminov “Rus adabiyoti 100 tomligi” va “O‘zbek adabiyoti 100 tomligi” ijodiy loyihalarida to‘plovchi va muharrir sifatida ishtirok etgan. Uning she’r va g‘azallari turk, ozarbayjon, rus, tojik, qirg‘iz va qozoq tillariga tarjima qilingan.
Shoirning “Sitamlaring” va “Nigorim” she’rlari xonanda Farruxbek Nabiyev ijrosida qo‘shiq sifatida yangragan.