“Kelajakka qadam” dasturi doirasida bitiruvchilar uchun seminar-trening o‘tkazildi

O‘zbekiston Respublikasi Prezidentining 2025-yil 14-fevraldagi “Oliy ta’lim tashkilotlari bitiruvchilarining ishga joylashishiga ko‘maklashish bo‘yicha qo‘shimcha chora-tadbirlar to‘g‘risida”gi PQ-61-son qarorida yoshlarning bandligini ta’minlash, bitiruvchilarning mehnat bozoriga integratsiyasini kuchaytirish hamda xususiy sektor va tijorat banklari ishtirokida kadrlar tayyorlash jarayonini takomillashtirish bo‘yicha muhim vazifalar belgilab berilgan.
Ushbu qaror ijrosi doirasida Kattaqo‘rg‘on shahri mahallalaridagi ishsiz yoshlar hamda institutimizning bitiruvchi talabalari uchun seminar-trening tashkil etildi. Tadbirni Kattaqo‘rg‘on davlat pedagogika instituti rektori Sherzod Urakov ochib berdi.
Seminarda O‘zmilliybank AJ Samarqand viloyati bosh boshqarmasi “Kelajakka qadam” markazi menedjeri Shermuhammad G‘aniyev hamda boshqarma boshlig‘i o‘rinbosari Azad Abbasov ishtirok etib, markaz faoliyati, dastur imkoniyatlari va bitiruvchilarni qo‘llab-quvvatlash mexanizmlari haqida batafsil ma’lumot berdi.
Shuningdek, “Kelajakka qadam” dasturi orqali o‘tgan yili muvaffaqiyatli loyihalar amalga oshirib, barqaror daromadga ega bo‘lgan institutimiz bitiruvchilari o‘z tajribalari bilan o‘rtoqlashdi. Ular dastur yoshlar uchun yaratayotgan amaliy imkoniyatlar, qo‘llab-quvvatlash mexanizmlari va natijalarning samaradorligini ta’kidlab o‘tdi.
Tadbir ishtirokchilari mazkur tashabbus bitiruvchilarning mehnat bozoriga muvaffaqiyatli kirib borishi uchun muhim omil bo‘lib xizmat qilishini qayd etdilar.