“Karyera kuni” mehnat yarmarkasi o‘tkazildi

Bugun, Kattaqo‘rg‘on davlat pedagogika institutida Kattaqo‘rg‘on shahar Maktabgacha va maktab ta’limi bo‘limi hamda Kambag‘allikni qisqartirish va bandlikka ko‘maklashish bo‘limi hamkorligida “Karyera kuni” mehnat yarmarkasi tashkil etildi.
Tadbirning asosiy maqsadi bitiruvchi talabalarni munosib ish o‘rinlariga yo‘naltirish, ularning bandligini ta’minlash hamda ta’lim tashkilotlaridagi mavjud vakant lavozimlar haqida ma’lumot berishdan iborat bo‘ldi.
Mehnat yarmarkasi davomida Kambag‘allikni qisqartirish va bandlikka ko‘maklashish Kattaqo‘rg‘on shahar bo‘limi vakili Q.Sanayev tomonidan hududdagi mavjud bo‘sh ish o‘rinlari taqdimoti o‘tkazildi.
Shuningdek, Kattaqo‘rg‘on shahar Maktabgacha va maktab ta’limi bo‘limi tasarrufidagi maktabgacha ta’lim tashkilotlari hamda umumiy o‘rta ta’lim maktablari vakillari ishtirok etib, mavjud vakant ish o‘rinlari haqida bitiruvchi talabalarga ma’lumot berdilar va ularni ishga taklif qildilar.
Tadbir davomida bitiruvchi talabalar ish beruvchilar bilan bevosita muloqot qilib, o‘zlarini qiziqtirgan savollarga javob oldilar hamda kelgusidagi mehnat faoliyati yuzasidan zarur ma’lumotlarga ega bo‘ldilar.
Mehnat yarmarkasi yakunida bitiruvchilar o‘zlariga ma’qul bo‘lgan ta’lim tashkilotlari bilan kelishuvga erishib, mehnat faoliyatini boshlash bo‘yicha tegishli shartnomalarni imzoladilar.