Taʼlim sifati - zamonaviy mutaxassis tayyorlashning asosiy sharti

Prezident Shavkat Mirziyoyev O‘zbekiston davlat mustaqilligining 35 yilligiga bag‘ishlangan nutqida mamlakatimizga bilimli, kelajak kasblarini puxta egallagan va mustaqil fikrlaydigan yangi avlod mutaxassislari zarurligini ta’kidladi. Davlatimiz rahbari ta’limga sifat va mazmun olib kirish masalasini shu maqsad bilan bog‘ladi. Kattaqo‘rg‘on davlat pedagogika institutida ta’lim sifatini oshirish va amaliy ko‘nikmalarga ega kadrlar tayyorlashga qaratilgan ishlar mazkur ustuvor yo‘nalish bilan hamohangdir.
Prezident nutqida ilgari surilgan birinchi milliy dastur bilim va malakani taraqqiyotning asosiy kapitaliga aylantirishga qaratilgan. Institutda bu maqsad fan dasturi, mashg‘ulot va baholash o‘rtasidagi bog‘liqlikni kuchaytirish, talabaga egallagan bilimini amaliy vaziyatda qo‘llash imkonini berish orqali amalga oshirilmoqda. Shu maqsadda darslarni kuzatish va pedagogik tahlil qilish, fan dasturlari hamda baholash mezonlarini o‘rganish, talabalar fikrini so‘rovlar orqali olish kabi ichki sifatni ta’minlash ishlari olib borilmoqda. Olingan xulosalar o‘qituvchilarga uslubiy yordam ko‘rsatish va o‘quv jarayonini takomillashtirishga yo‘naltiriladi.
Ta’lim mazmunida talabaning faol ishtiroki muhim o‘rin tutadi. Muammoli vaziyatlarni tahlil qilish, loyiha topshiriqlari, amaliy mashqlar va jamoaviy ishlash orqali talabalar bilimdan amaliy foydalanishni o‘rganadi. Bunday yondashuv bo‘lajak pedagog va muhandislarning mustaqil fikrlashi, muloqot qilishi hamda kasbiy mas’uliyatini rivojlantirishga xizmat qiladi.
Institutda 21 ta bakalavriat ta’lim yo‘nalishi va 4 ta magistratura mutaxassisligi bo‘yicha kadrlar tayyorlanmoqda. 2026-yilda “Energetika muhandisligi” va “Transport vositalari muhandisligi” yo‘nalishlarining tashkil etilishi hudud ehtiyojlarini hisobga olgan holda kadrlar tayyorlash imkoniyatini kengaytirdi. Bu yo‘nalishlarda nazariy tayyorgarlikni amaliy mashg‘ulotlar va ishlab chiqarish muhiti bilan bog‘lash ustuvor vazifalardan biridir.
Shu maqsadda ish beruvchilar va ishlab chiqarish tashkilotlari bilan hamkorlik, amaliyot bazalaridan foydalanish hamda soha mutaxassislarini o‘quv jarayoniga jalb etish masalalariga e’tibor qaratilmoqda. Talaba o‘qish davomida real kasbiy vazifalar bilan ishlashi, raqamli vositalardan foydalanishi va o‘z bilimini muntazam yangilab borishi kerak.
O‘quv jarayonini qo‘llab-quvvatlash uchun institutda 7 ta kompyuter sinfi, 138 ta kompyuter, 47 ta proyektor, 6 ta interaktiv doska va 12 ta Wi-Fi qurilmasi mavjud. Axborot-resurs markazida 3 679 nomdagi 13 821 nusxa bosma adabiyot, elektron kutubxonada esa 3 135 nomdagi resurs jamlangan. Mazkur imkoniyatlardan dars va mustaqil ta’limda foydalanish ta’lim mazmunini boyitishga xizmat qiladi.
Prezident nutqida ta’kidlangan bilimli va mustaqil fikrlaydigan yangi avlod mutaxassislarini tayyorlash vazifasi institutdagi ishlarning asosiy mezonidir. Ta’lim sifati o‘quv jarayonini muntazam tahlil qilish, amaliy tayyorgarlikni kuchaytirish va talabaning egallagan ko‘nikmalarini real vaziyatda namoyon eta olishi orqali o‘z ifodasini topadi.
Voris Axrorov,
Kattaqo‘rg‘on davlat pedagogika instituti
Ta’lim sifatini ta’minlash bo‘limi boshlig‘i.