Talabalar tarixiy muzeylarda bo‘ladi

Bugun erta tongda Kattaqo‘rg‘on davlat pedagogika institutining bir guruh talabalari Toshkent shahriga yo‘l oldi.
Mazkur tashrif Oliy ta’lim, fan va innovatsiyalar vazirligining 2026-yil may oyida belgilangan topshiriqlari ijrosi doirasida tashkil etilmoqda. Unda o‘zbek xalqi va davlatchiligi tarixi, Birinchi va Ikkinchi Renessans davrlari, buyuk allomalar hayoti va ilmiy merosi, shuningdek, boy tarixiy, diniy hamda madaniy qadriyatlarimizni keng targ‘ib qilish maqsad qilingan.
Tashrif davomida talabalar Toshkent shahridagi Islom sivilizatsiyasi markazi, Amir Temur muzeyi, “O‘zbekiston prokuraturasi tarixi” muzeyi hamda respublikaning turli hududlarida faoliyat yuritayotgan O‘zbekiston Respublikasi Ichki ishlar vazirligi va O‘zbekiston Respublikasi Mudofaa vazirligi huzuridagi tarixiy muzeylarda bo‘lishadi.
Mazkur ma’naviy-ma’rifiy tashriflar yoshlarning tarixiy xotirasini mustahkamlash, milliy qadriyatlarga hurmat ruhini yuksaltirish hamda ajdodlarimizning boy ilmiy va madaniy merosini chuqur o‘rganishga xizmat qiladi.