Giyohvandlik vositalari bilan bog‘liq jinoyatlar uchun javobgarlik kuchaytirildi

2026-yil 11-iyunda qabul qilingan “Ayrim qonun hujjatlariga o‘zgartirish va qo‘shimchalar kiritish to‘g‘risida”gi Qonun (O‘RQ-1151-son) bilan giyohvandlik vositalari, psixotrop moddalar va ularning analoglari bilan bog‘liq jinoyatlar uchun javobgarlikni takomillashtirishga qaratilgan yangi normalar belgilandi.
Qonunga muvofiq, O‘zbekiston Respublikasi Jinoyat kodeksiga quyidagi qo‘shimchalar kiritildi:
giyohvandlik vositalari, psixotrop moddalar yoki ularning analoglarini ishlab chiqarish, tayyorlash yoki qayta ishlash maqsadida g‘ayriqonuniy narkolaboratoriya tashkil etgan shaxslar 5 yildan 10 yilgacha ozodlikdan mahrum qilish bilan jazolanadi;
giyohvandlik vositalari, psixotrop moddalar, ularning analoglari yoki kuchli ta’sir qiluvchi moddalarni iste’mol qilish yoxud tarqatish uchun bangixona tashkil etish yoki uni saqlash 3 yildan 5 yilgacha ozodlikdan mahrum qilish bilan jazolanishi belgilandi;
giyohvandlik vositalari, psixotrop moddalar yoki ularning analoglari, shuningdek, kuchli ta’sir qiluvchi moddalarning qonunga xilof muomalasiga homiylik qilganlik uchun 5 yildan 8 yilgacha ozodlikdan mahrum qilish jazosi nazarda tutilgan;
kuchli ta’sir qiluvchi yoki zaharli moddalarni o‘g‘rilik yoki firibgarlik yo‘li bilan qonunga xilof ravishda egallagan shaxslarga 3 yilgacha axloq tuzatish ishlari, 2 yildan 5 yilgacha ozodlikni cheklash yoki 5 yilgacha ozodlikdan mahrum qilish jazosi qo‘llaniladi.