Гиёҳвандлик воситалари билан боғлиқ жиноятлар учун жавобгарлик кучайтирилди
2026-йил 11-июнда қабул қилинган “Айрим қонун ҳужжатларига ўзгартириш ва қўшимчалар киритиш тўғрисида”ги Қонун (O‘RQ-1151-сон) билан гиёҳвандлик воситалари, психотроп моддалар ва уларнинг аналоглари билан боғлиқ жиноятлар учун жавобгарликни такомиллаштиришга қаратилган янги нормалар белгиланди.
Қонунга мувофиқ, Ўзбекистон Республикаси Жиноят кодексига қуйидаги қўшимчалар киритилди:
гиёҳвандлик воситалари, психотроп моддалар ёки уларнинг аналогларини ишлаб чиқариш, тайёрлаш ёки қайта ишлаш мақсадида ғайриқонуний нарколаборатория ташкил этган шахслар 5 йилдан 10 йилгача озодликдан маҳрум қилиш билан жазоланади;
гиёҳвандлик воситалари, психотроп моддалар, уларнинг аналоглари ёки кучли таъсир қилувчи моддаларни истеъмол қилиш ёхуд тарқатиш учун бангихона ташкил этиш ёки уни сақлаш 3 йилдан 5 йилгача озодликдан маҳрум қилиш билан жазоланиши белгиланди;
гиёҳвандлик воситалари, психотроп моддалар ёки уларнинг аналоглари, шунингдек, кучли таъсир қилувчи моддаларнинг қонунга хилоф муомаласига ҳомийлик қилганлик учун 5 йилдан 8 йилгача озодликдан маҳрум қилиш жазоси назарда тутилган;
кучли таъсир қилувчи ёки заҳарли моддаларни ўғрилик ёки фирибгарлик йўли билан қонунга хилоф равишда эгаллаган шахсларга 3 йилгача ахлоқ тузатиш ишлари, 2 йилдан 5 йилгача озодликни чеклаш ёки 5 йилгача озодликдан маҳрум қилиш жазоси қўлланилади.
