Kattaqo‘rg‘on davlat pedagogika institutida xalqaro miqyosda e’tirof etilgan ingliz tili mutaxassisi, nufuzli mukofotlar sohibi Feruz Akbarov ishtirokida talabalar uchun mahorat darsi tashkil etildi.

16 yillik pedagogik tajribaga ega Feruz Akbarov Hindistonning Pune universitetida ingliz tili bo‘yicha magistrlik darajasini olgan. U 2014-yilda Xitoyda “Yilning eng yaxshi TESOL o‘qituvchisi” deb e’tirof etilgan hamda xalqaro ingliz tili o‘qituvchilarini birlashtiruvchi ETA Uzbekistan tarmog‘ining asoschisi hisoblanadi.
Mahorat darsi davomida talabalarga sun’iy intellekt yordamida ingliz tilida erkin va ishonch bilan gapirish ko‘nikmalarini rivojlantirishning zamonaviy usullari haqida batafsil ma’lumot berildi. Mashg‘ulotda sun’iy intellekt vositalaridan foydalanish orqali og‘zaki nutqni takomillashtirish, talaffuz ustida ishlash, yangi so‘zlarni o‘zlashtirish hamda kundalik muloqotda o‘z fikrini ravon ifodalash imkoniyatlariga alohida e’tibor qaratildi.
Interaktiv yondashuvlar asosida o‘tgan mashg‘ulot talabalarga xorijiy tilni o‘rganishda zamonaviy texnologiyalardan samarali foydalanish, mustaqil ta’lim olish va o‘z nutqiy salohiyatini rivojlantirish bo‘yicha muhim tavsiyalar berdi.
Mazkur uchrashuv talabalarning ingliz tiliga bo‘lgan qiziqishini oshirish, ularning kommunikativ kompetensiyasini mustahkamlash hamda sun’iy intellekt imkoniyatlaridan ta’lim jarayonida oqilona foydalanish ko‘nikmalarini shakllantirishga xizmat qildi.