“Келажак соати”: жадидлар мероси – маърифат ва тараққиёт сабоғи

Каттақўрғон давлат педагогика институтида талаба-ёшларнинг маънавий-интеллектуал салоҳиятини юксалтириш, тарихий тафаккури ва миллий ўзликни англаш туйғусини мустаҳкамлаш мақсадида “Келажак соати” машғулотлари ташкил этилди.

Машғулотлар “Жадидлар. Тугалланмаган ҳикоя” мавзусига бағишланиб, унда жадид боболаримизнинг миллий уйғониш ҳаракатидаги ўрни, таълим ва илм-маърифатни ривожлантириш йўлидаги фаолияти, тараққиётга доир илғор қарашлари ҳамда бой илмий-маънавий мероси ҳақида маълумотлар берилди.

Шунингдек, жадидлар томонидан илгари сурилган илм-маърифат, ватанпарварлик, миллий ўзликни англаш ва замонавий билимларни эгаллаш каби ғояларнинг бугунги ёшлар тарбиясидаги аҳамияти алоҳида таъкидланди.

Мазкур машғулотлар талаба-ёшларнинг тарихий ва маънавий меросга оид билимларини бойитиш, дунёқарашини кенгайтириш ҳамда мамлакатимиз тараққиётига дахлдорлик туйғусини юксалтиришга хизмат қилмоқда.

Маълумот ўрнида: “Келажак соати” – ёшларнинг билим ва дунёқарашини кенгайтириш, уларни мамлакатимиз тараққиётининг устувор йўналишлари билан таништириш ҳамда маънавий-маърифий савиясини оширишга қаратилган муҳим ташаббуслардан биридир.