Каттақўрғон давлат педагогика институтида халқаро миқёсда эътироф этилган инглиз тили мутахассиси, нуфузли мукофотлар соҳиби Феруз Акбаров иштирокида талабалар учун маҳорат дарси ташкил этилди.

16 йиллик педагогик тажрибага эга Феруз Акбаров Ҳиндистоннинг Пуне университетида инглиз тили бўйича магистрлик даражасини олган. У 2014-йилда Хитойда “Йилнинг энг яхши TESOL ўқитувчиси” деб эътироф этилган ҳамда халқаро инглиз тили ўқитувчиларини бирлаштирувчи ETA Узбекистан тармоғининг асосчиси ҳисобланади.
Маҳорат дарси давомида талабаларга сунъий интеллект ёрдамида инглиз тилида эркин ва ишонч билан гапириш кўникмаларини ривожлантиришнинг замонавий усуллари ҳақида батафсил маълумот берилди. Машғулотда сунъий интеллект воситаларидан фойдаланиш орқали оғзаки нутқни такомиллаштириш, талаффуз устида ишлаш, янги сўзларни ўзлаштириш ҳамда кундалик мулоқотда ўз фикрини равон ифодалаш имкониятларига алоҳида эътибор қаратилди.
Интерактив ёндашувлар асосида ўтган машғулот талабаларга хорижий тилни ўрганишда замонавий технологиялардан самарали фойдаланиш, мустақил таълим олиш ва ўз нутқий салоҳиятини ривожлантириш бўйича муҳим тавсиялар берди.
Мазкур учрашув талабаларнинг инглиз тилига бўлган қизиқишини ошириш, уларнинг коммуникатив компетенсиясини мустаҳкамлаш ҳамда сунъий интеллект имкониятларидан таълим жараёнида оқилона фойдаланиш кўникмаларини шакллантиришга хизмат қилди.